LAOAG CITY – Kinumpirmaran ni ABC Federated President Elmer Faylogna nga adda ti emergency meeting da a kakapitan ditoy probinsya.
Daytoy ket mainaig iti agtultuloy a panagngato ti bilang ti kaso a dengue ditoy Ilocos Norte.
Iti datos ti Provincial Health Office (PHO), umaboten ti nasurok a 700 dagiti biktima ti dengue ditoy probinsya.
Innayon ni Faylogna nga addan ti immuna a panagtataripnong da a kakapitan ditoy probinsya a mangilatang da ti pondo a maigatang kadagiti equipments ken agas kas paset ti addang da tapno maliklikan ti sakit a dengue.
Kuna pay ni Faylogna a naki-koordinar dan ken ni Provincial Health Officer Doctor Josephine Ruedas mainaig iti daytoy a banag.
