LAOAG CITY – Balligi a naarestar ti maysa nga empleado ti lokal a gobierno iti ili ti Burgos iti inyuswat a drug buy bust operation dagiti kameng ti PDEU ken PNP iti nasao nga ili.
Nabigbig ti suspek a ni Reynold Ramos y Fayloga, agtawen ti 54, awanan ti asawa ken job order kas utility iti LGU Burgos.
Nakumpiskar ken ni Ramos ti maysa a sachet ti maatap a shabu a nailako iti nagpammarang a poseur buyer ken ti sangaribo a pisos a nausar iti transaksyon.
Kabayatanna, iti panangkapkap dagiti otoridad iti suspek ket nakumpiskar iti ikot na ti nayun a pito a sachet ti maatap a shabu pakairamanan ti nagduduma a drug paraphernalia.
Rumrumuar a ti suspek ket high value individual iti drug watchlist ti PNP ditoy probinsya ken nabayagen a masipsiputan.
Naamoan a simmuko daytoy kadagiti otroridad idi tawen 2016 gapu iti iligal a droga.
Nagtalinaed ti suspek iti kustodyar ti PDEU ken manamnama a sumango iti kaso a panagsalungasing iti RA 9165 wenno Comprehensive Drugs Act of 2002.
