LAOAG CITY – Nagtalinaed iti kustudiyar ti PNP-Laoag dagiti dua a lallaki kalpasan a naarestar da iti inyuswat ti PDEA a drug buy bust operation idiay Barangay 18 ditoy ciudad ti Laoag.
Nabigbig dagiti suspek a da Richard Savellano, agtawen ti 42, naasawaan, maysa a government employee ken residente iti Barangay 53, Rioeng ditoy ciudad ti Laoag ken ni Quirico Bagaporo, agtawen ti 42, awanan ti asawa, tubo idiay Negros Occidental ken agdama nga agnanaed iti Barangay 18, ditoy ciudad ti Laoag.
Basar ti report, naarestar dagiti dua bayat ti panaglako da iti police pusuer buyer ti maatap a shabu.
Nakumpiskar manipud kadagiti suspek ti beltbag a naglaon ti 11 a ribo boodle money, maysa a 1,000 bill, sabali pay a 1,500 a pisos ken maysa a sachet a maipagaropa naglaon ti maigarop a shabu nga agbalor ti 12,500 a pisos ken wallet nga addaan ti kwarta ken lugan.
Manamnama a sumango ti kaso dagiti dua a lalaki iti panaglako ti iligal a droga.
Kabayatanna, kinumpirmaran ni SPO3 Harold Nicolas iti PNP-Laoag a ni Richard Savellano alyas Ryan ket empelado ti City Agriculture Office ken anak ti kapitan ti Barangay Rieong ditoy ciudad ti Laoag.
Segun kenni Nicolas, ammo dan a napigsa a supplier ti droga iti nasao a barangay ngem saan da a nadeterminar, addan ti tallo a tawen ti napalabas.
Inbatad na a nadeterminar da laeng ti katatao ni Savellano, addan ti tallo a lawas ti napalabas isut gapo na a naiyuswat ti operasyon.
Kunana nga adda iti drug watchlist iti street level ni Savellano ken daytoy ti middleman iti nagduduma nga operasyon.
Inadmitir na a nakigtot isuna idi naamoan da a ni Savellano ti napigsa a supplier ti droga ken saan da a ninamnama gapo ta maysa daytoy nga empleado ti gobierno.
