LAOAG CITY – Naglikudan ni Mr. Saldy Bernabe a maysa nga empleado ti Laoag City Hall ti reklamo kenkuana a maipagarup nga agpaspasada kabayatan a naka-duty daytoy.
Segun kenkuana, alas sais ti bigat agingga iti ala una ti malem ti duty iti trabahona kas empleado ti City Hall ditoy siudad ti Laoag.
Inbatadna nga apaman a malpas ti duty-na iti trabaho ket mapanna itulod ti anakna iti pagadalan no sadinno a no adda dagiti kakadua ti anakna ket igiddannan nga ilugan dagitoy nga awan ti bayadna.
Kunana a saan daytoy a makiin-innagaw kadagiti pasahero dagiti tricycle drivers gapu ta ammona nga ilugar ti ar-aramidenna.
Inlawlawagna a kalpasan a maitulodna ti anakna ket insigida daytoy nga agpasada tapno adda pay ti nayon a kuarta a maurnongna a pangsupusop kadagiti gastosen dagiti annakna kas ti panangipaay ti balon a kuarta para kadakuada.
Inpettengna a nabayagen a kastoy ti wagas nga ar-aramidenna gapu ta admitarenna a saan nga umanay ti sueldona kas agpapaay iti lokal a gobierno isut gapuna a kasapulanna pay ti agpasada.
Innayonna a mamati daytoy a dakes nga apal ti naipadanon a reklamo kontra kenkuana.
Immuna iti daytoy, adda dagiti sumagmamano a tricycle drivers ti nagreklamo babaen iti ipa-Bombo segment ti Bombo Radyo Laoag nga adda ti maysa nga empleado ti Laoag City Hall ti maipagarup nga agpaspasada kabayatan a naka-duty daytoy.
