LAOAG CITY – Naituding nga agtestigo ni dati a Department of Public Works and Highways (DPWH) Bulacan District Engineer Henry Alcantara kontra ken ni dati a Congressman Elizaldy Co iti Sandiganbayan intono Marso 23 mainaig iti binilyon nga anomalya iti flood control projects.
Inpakaammo ti prosekusyon iti sixth division ti anti-graft court a tumakder kas testigo ni Alcantara.
Maipalagip nga ikonkonektar ni Alcantara ni Co kas “top proponent” dagiti insertion iti national budget, a nagresulta iti maipagarop a kickback nga agbalor ti P181 milyon.
Ti naruay a kwarta ket maipagarop a naideliber ken ni Co, a mangipaneknek kadagiti akusasyon ni Alcantara iti babaen kadagiti ebidensya.
Naikonektar pay ni Co iti maysa a P289-milyon a kaso ti malversation ken graft iti Oriental Mindoro, no sadinno a maipagarop a nakaawat ti pannakabagi wenno share ni Undersecretary. Roberto Bernardo manipod iti dati kongresista iti babaen ni Alcantara.
Iti agdama, adda iti babaen ti Witness Protection Program (WPP) ti Department of Justice (DOJ) ni Alcantara nga immunan a nagtestigo kadagiti panagdengngeg iti Senado mainaig iti maanomalya nga infrastructure projects.
