LAOAG CITY – Naragsak nga inpakaammo ni Engr. Cynthia Iglesia a nagserbi isuna iti 36 a tawen iti Philippine Atmospheric, Geophysical and Astronomical Services Administration wenno PAGASA.
Segun kenkuana, ti naunday a panawen a nagserbi daytoy iti nasao nga ahensia ket mangipaneknek ti panagayatna iti trabaho.
Inbatadna nga adu ti nasursurona sipod pay idi karugrugina a simrek iti trabaho no sadinno a nangrugi daytoy iti kababaan a puesto agingga nga in-inot daytoy a na-promote iti trabaho.
Kunana a kabayatan ti panagtrabahona ket nangala isuna ti Masteral Degree-na iti Northwestern University a nangipaay ti gundaway tapno mai-promote isuna iti nangatngato a posision.
Inlawlawagna a dakkel a responsibilidad ti ig-iggamanna a trabaho gapu ta aggapu kenkuana ti impormasion maipanggep iti sasaaden ti panawen nangruna ditoy probinsia.
Innayonna a nagturpos isuna iti kurso a Bachelor of Science in Civil Engineering.
Kabayatanna, naammoan nga inauna iti walo nga agkakabsat ni Engr. Iglesia a tubo daytoy idiay Quezon City ngem gapu iti trabahona ket nagtalinaed daytoy ditoy siudad ti Laoag.
