LAOAG CITY – Naiget nga imonmonitor ti Department of Foreign Affairs (DFA) ti damag seknan iti posible a panag-freeze ti tulong pinansial ti Estados Unidos, basar iti Presidential Communications Office (PCO).
Inbatad ti Department of Foreign Affairs a makibinnulig daytoy iti United States Department of State tapno ammoen ti agbalin nga epekto daytoy iti Pilipinas.
Ti panag-freeze ti United States foreign aid a dagus nga epektibo ket gapu iti 90 nga aldaw a panangtingiting nga inbilin ni Presidente Donald Trump tapno masigurado a ti tulong ket maibasar iti pagalagadanna iti ruar.
Basar iti memorandum a pinirmaan ni United States Secretary of State Marco Rubio, awan ti baro nga obligasion para iti foreign assistance ti mapalubusan agingga a saan pay a nalpas ti panangtingiting.
Naammoan a ti Estados Unidos ti kadakkelan a donor ti tulong iti sangalubongan ken nangipaay ti $72 bilyon a tulong idi fiscal year 2023.
