LAOAG CITY – Inlawlawag ni Sanggunian Bayan Member Ninoy Aquino, chairman ti committee on laws iti ili ti Solsona mainaig dagiti estado dagiti sumagmamano a proyekto iti napalabas nga administrasyon iti nasao nga ili.
Inbinsa-binsa na dagiti proyekto a multiplier farm, slaughter house, modern stadium, sanitary landfill ken dadduma pay a naidasar iti regular session.
Segun kenni Aquino, nairekomendar iti kallabes ti pannakairekep ti multiplier farm ken maiyakar iti lote a kukua ti munisipyo.
Makaammo ti mayor nga agtignay no adda dagiti makita na nga anomalya kadagiti naukkon a rekord ti komite babaen ti panagimbestigar na.
Mainaig iti daytoy, maituloy ti imbestigasyon mainaig ti isyu iti sanitary landfill intono Biernes.
Inbunannag na a mapaayaban ti naglako ti lote, dati a sangguniang bayan mamber, surveyor, municipal assessor ken ti municipal accountant.
Inbatad ni Aquino a saan a mairehistro ti municipal assessor ti lote a nagatang para ti sanitary ladfill babaen ti panagsurat na kenni Mayor Joseph De Lara.
Kabayatanna, inlawlawag ni Aquino a saan a naipaima ti modern stadium iti committee on laws ngem ketdi iti committee of the whole.
Kuna na nga adda ti nakita da a discrepancy ken adda pay ti record iti commission on audit seknan ti pannakaipatakder ti nasai a pasdek.
Iti agdama ket iyur-uray da dagiti umiso a papeles a maisumitir iti municipal mayor ken makaammo a mangtingiting dagitoy.
Innayon ni Aquino a naigeddan ti proyekto nga slaughter house a naimbestigar itay kallabes ket naduktalan nga awan pay ti kuryente na nupay adda ti program of work na.
Inaprobaran ti Sangguniang Bayan dagiti rekomendasyon ti Aquino dagiti naidatag mainaig ti estado dagitiu sumagmamano a proyekto itay kallabes.
Kinumpirmaran ni Mayor Joseph de Lara iti ili ti Solsona nga inpaay ti Sangguniang Bayan ti bileg a mangipila ti reklamo kontra dagiti opisyal wenno dati nga opisyal nga adda ti pannakainaig na kadagiti sumagmamano a proyekto a makukuwestiyonaran.
Kuna na a dagdagen ti sangguniang bayan a mangipila ti reklamo kontra kadagiti maseknan nga opisyal rason nga innala na amin dagiti dukomento ken inyuman na iti maysa nga abogado.
Inbatad ni De Lara a napan na inpabasa iti abogado para ti pannakaisagana ti maipila a kaso kontra kadagiti maseknan mainaig iti multiplier farm, sanitary land fill ken modern stadium.
Inbunannag na a naukag ti estado dagiti nasao a proyekto nupay ti immuna a nagsasaritaan dagiti miembro ti sangguniang bayan ket pannakaimontar ti electric fan iti civic center kabayatan ti regular session.
