LAOAG CITY – Inanunsio ti Estados Unidos nga isardengnan ti naval blockade kontra iti Iran kalpasan a nagpirma ti dua a pagilian iti maysa a katulagan a gagem a lippasen ti tension iti Middle East.
Basar iti United States Central Command, inikkatdan ti blockade maiyallubog iti pammilin ni United States President Donald Trump.
Gapu iti daytoy, nalukatan manen ti Strait of Hormuz, maysa a napateg a ruta a pagdaldalyasatan dagiti barko nga adda ti kargana a langis ken dadduma pay.
Nadakamat a karaman iti katulagan ti insigida a panagpasardeng ti operasion ti United States military no sumurot ti Iran iti katulagan.
Karaman kadagiti kondision iti daytoy ket ti panangdadael ti Iran iti pagar-aramidanda ti enriched uranium ken panagpasardeng iti panangpundo kadagiti kaalyado nga armado a grupo iti rehion.
Iti baet a naipatungpalen ti katulagan, agdudua met ditoy ni Iran Supreme Leader Mojtaba Khamenei, kunana a saan a naan-anay daytoy a pabor iti katulagan ngem inpalubosna nga ituloy kalpasan a nakaawat dagiti kasiguradoan manipud ken ni Iranian President Masoud Pezeshkian.
Inbatad ni Khamenei a saan a kayatna a saoen a natuloy ti katulagan ket sumuroten ti Iran iti sumagmamano pay a negosasion daytoy iti Estados Unidos
Kabayatanna, kuna ni Trump a namnamaenna a tungpalen ti dua a pagilian ti ceasefire tapno maituloy ti kinakappia.
Nangipeksa ti suporta iti katulagan ni Israeli Prime Minister Benjamin Netanyahu ken inpettengna ti kinapateg ti natibker a relasion ti Israel ken Amerika.
Nupay kasta, adda ti sumagmamano nga opisial iti gabinetena ti nangipakita ti panagkontra iti katulagan.
Naammoan a nakailanad iti katulagan ti panagsardeng ti aniaman a gubat, panaglukat manen ti Strait of Hormuz, panagsardeng ti Iran a maaddaan ti nuclear weapon ken panangiyalokar ti pundo nga umabot iti $300 billion para iti panagbangon ken panagpadur-as ti ekonomia ti Iran.
Iti baet daytoy, nagtalinaed nga aktibo dagiti panangatake iti nagbaetan ti Israel ken ti grupo nga Hezbollah iti Lebanon kalpasan nga irakurak ti katulagan.
Nupay kasta, basar iti Israel nga agsina ti operasion kontra iti Hezbollah idinto nga inrakurak ti Iran a karaman iti katulagan ti Amerika ti panagsardeng ti gubat iti Lebanon.
