LAOAG CITY – Inrakurak dagiti opisial manipud idiay Estados Unidos ken China ti tallo a bulan a truce tapno pagsaritaan dagiti isyu iti panagbaba ti taripa.
Segun ken ni United States Trade Representative Jamieson Greer ken United States Treasury Secretary Scott Bessent, agkissay ti taripa kadagiti produkto ti China ti Estados Unidos manipud iti 145% a mapagbalin a 30% laeng idinto ti China met ket agkissay ti 10% kadagiti produkto ti Estados Unidos.
Inbatad ni Bessent a dagiti nangato a taripa ket nangitunda ti pannakaulaw ken nagbalin a maysa a klase ti “embargo” iti nagbaetan ti dua a pagilian, maysa a situasion a saan a kayat nga agpada ti dua a pagilian.
Dinayaw ti Ministry of Commerce ti China ti katulagan ken kiniddawna ti panagsardeng ti Estados Unidos kadagiti unilateral a panagngato ti taripa.
Inrakurak ti China ti pannakasuspenso ti dadduma pay nga addang nga inrubuatna kas sungbat kadagiti taripa ti Estados Unidos pakairamanan ti panangkontrol iti exportation dagiti naisangsangayan a mineral.
Naammoan nga uray adda dagiti positibo a reaksion manipud kadagiti merkado ken negosio, adda dagiti nangipaay ti ballaag mainaig iti agtultuloy a kinaawan ti kasiguradoan nangruna a ti nasao a katulagan ket agpaut laeng ti tallo a bulan.
