LAOAG CITY – Nangipataw ti nalawa a panangngato ti taripa ni United States President Donald Trump kadagiti kangrunaan a partners ti Estados Unidos maipapan iti negosio kas ti Canada, Mexico ken China.
Daytoy ket maibasar iti inruar a rakurak ti White House idi Sabado gapu iti maipagarup a lumawlawa nga illegal immigration ken pakairamanan ti panagserrek ti illegal drugs.
Naammoan a dagiti export manipud idiay Canada ken Mexico nga agturong idiay Estados Unidos ket mapatawan ti 25% a taripa uray ti pangal-alaan ti enerhia manipud idiay Canada ket maaddaan ti nababbaba a taripa a 10%.
Naikeddeng a mangrugi ti pannakaipatungpal dagiti taripa inton Martes.
Mainaig iti daytoy, dagiti negosio idiay China nga agdama nga addan ti taripa dagitoyen ket makapasar pay ti kanayonan a 10% a taripa kas basar iti White House.
Kabayatanna, gagem daytoy a pagsungbaten dagiti tallo a pagilian para iti inkarida a lappedan dagiti illegal immigration ken ti panagraira dagiti iligal a droga.
Ita a lawas, manamnama met ti panangipataw ti Estados Unidos ti taripa kadagiti pagilian iti European Union.
Inkarina pay ti panangipataw ti taripa kadagiti semiconductor, landok, gas ken dadduma pay.
