LAOAG CITY – Inbutaktak ti pagilian nga Estonia nga adda ti tallo a Russian fighter jets a dimmalan iti airspace da.
Segun ken ni Estonian Foreign Minister Margus Tsahkna, ti tallo a Russian MiG-31 fighter jets ket simrek iti airspace da iti Gulf of Finland nga awan ti panagpakada da.
Gapu iti daytoy, pinaawagan da ti chargé d’affaires ti Russia tapno pagpalawagen iti insidente.
Daytoyen ti maikapat a daras a simrek ti Russia ti airspace ti Estonia.
Innayon ti Estonian Foreign Minister a rumbeng laeng a maipangato ti political ken economic pressure kontra iti Russia gap iti panagbalin na nga agresibo kadagiti boundaries da.
Kalikagom ni European Commission President Ursula von der Leyen a mapatawan ti ndagsen a sanctions ti Russia gapu iti ar-aramiden na a panaglabsing iti airspace ti miyembro da.
Maipalagip nga immunan nga inreklamo ti Poland ken Romania ti panaglabsing ti Russia iti airspace da.
