LAOAG CITY – Inyistorya ti estudyante a nabigbig laeng iti nagan na a “Thea” iti Barangay Caraitan iti ili ti Badoc ti sibubukel a napasamak no apay a nagrangasan a kinabkabil dagiti agkabsat a babai no sadinno a naalaan ti video ken nai-upload iti facebook.
Segun ken ni Thea, ti maysa a babai a nangkabkabil kenkuana ket katrabahoan na iti maysa a galyeraan ken binigbig na daytoy iti nagan na a Juliet Lozero.
Inadmitir ni Thea a namin-adon a daras a pilpiliten ti live-in partner ni Lozero a rumuar da tapno mapan agmeryenda ken dadduma pay a pangaw-awisan na ngem saanna pulos a tinutupan daytoy gapu ta ammo na nga adda ti kadendenna na.
Inbatad na nga adda ti group chat da nga agkakatrabahoan no sadinno nga adda ti paggiistoryaan ni Lozero ken dagiti kakadwa da a maysa a babai a maipagarop a mabaybayadan, agag-agaw ti asawa ken dadduma pay nga agkakaalas a sarita.
Inpalgak na nga idi mabasbasa na ti paggiistoryaan da Julie ket kumpiyansa a saan nga isuna gapu ta am-ammo na ti bagina ken saanna a kasdiay ti klase na a babai.
Nupay kasta, iti karabian na ket innaganan daytoy ni Lozero ken uray ania ti panagpalawag na a saan a pudno ti alegasyon na ket saanna a mamati ti maseknan agingga nga inbilin na nga urayen na daytoy ta agsarita da.
Inpakaammo na nga iti panagkikita da ket dinarop a dagus ti kabsat ni Lozero ken ditoyen a nagrangasan da a kinabkabil no sadinno a tinulpak, kinugtaran ken induron-duron da ti biktima.
Innayon na nga awan ti naaramidan dagiti tattao a nakakita iti napasamak no saan a ti manganawa laeng ken ni Julie gapu ta masikog daytoy.
Kalpasan ti napasamak ket napan inreport a dagus ni Thea iti Philippine National Police no sadinno nga inbilin da kenkuana a mapan agpa-eksamen iti ospital gapu ta ado dagiti sinagaba na a sugat iti nagduduma a paset ti bagina.
Malaksid iti panangdangran ni Lozero kenni Thea ket pangpangtaan na pay daytoy a papatayen na.
Kuna ni Thea a ti bilin ti Philippine National Police ket trataren da paylaeng ti napasamak iti biang ti barangay ngem no saan a masolbar ket isunto ti panangiyuli da iti opisina da.
Mainaig iti daytoy, inpasingked ni Thea a pursigido da a mangipila ti reklamo kontra ken ni Lozero pakairamanan ti kabsat na.
Ikarkarigatan ti Bombo Radyo Laoag a kontaken ken alaen ti kabibiangan ni Lozero mainaig iti napasamak.
