LAOAG CITY – Inawaten ti pamilia ti beterana nga aktres a ni Eva Darren ti panagkiddaw ti panagpadispensar ti FAMAS wenno Filipino Academy of Movie Arts and Sciences maipapan iti snubbing incident a napasamak iti awards’ night ti nasao nga award-giving body.
Basar iti online post ti anak ti beterana nga aktres a ni Fernando de la Pena, inimbitaran ti FAMAS ti ina daytoy nga agprisentar ti award kaduana ti aktor a ni Tirso Cruz III.
Inawat met ti aktres ti imbitasion nangruna ket naudi nga adda isuna iti FAMAS ket idi pay laeng tawen 1969 no sadino nangabak ni Eva Darren ti Best Supporting Actress award para iti pelikulana nga Ang Pulubi.
Nupay kasta, iti kanito nga ipresentar ti award ket saan a naawagan ni Eva Darren ken sabalin ti kadua ni Cruz iti stage.
Maibasar iti apology post ti FAMAS, paset ti programa ti aktres ngem saan a masarakan ti ayan ti aktres isu a nagdesision ti production team a mangala ti sabali nga artista kas kasukat ni Eva Darren tapno ipresentar ti award kadua ni Cruz.
Kuna pay ti organisasion, live ti nasao a show isu a kinasapulanda nga iremedyo dagus ti problema ngem inpettengda a saan daytoy nga intensyonal ken panangbaybay-a iti grupoda.
Inlawlawag met ti anak ti aktres a nakatugaw ti ina daytoy iti sango ken tengnga ti stage kaduana ti dadduma pay a beterana nga aktres nga isuda Divina Valencia ken Marissa Delgado.
Immunan nga inawagan ti kabagian ti aktres ti napasamak kas ‘disrespectful, unethical ken unprofessional.’ Nupay kasta, inawat ti pamilia ti panagpadispensar ti FAMAS ken mangnamnama daytoy a saanen a maulit pay ti insidente.
Nangipaay pay ni De La Pena ti rekomendasion para kadagiti sumaruno pay nga awards’ night ti FAMAS nga ag-stick daytoy iti script ken agsuot a nasayaat iti eyeglasses.
Kabayatanna, plano ti FAMAS a bumisita ken ni Eva Darren tapno personal daytoy a makasarita ken saludaran iti kontribusion daytoy iti industria.
