LAOAG CITY – Awanen dagiti residente a nagtalinaed iti evacuation centers iti ili ti Pagudpud kalpasan ti iduduprak ti Super Typhoon Nando.
Daytoy ti inpakaammo ni Mr. Hendrick Pedronan, ti mangidadaulo iti Municipal Disaster Risk Reduction and Management Office iti ili ti Pagudpud.
Segun kenkuana, iti agdama ket manarimaanen ti clearing operations da para iti al-alisto a panagrekobre ti ili ti Pagudpud iti nagbalin nga epekto ti bagyo Nando, aglalo ti pannakaiwaknit dagiti natumba a poon ti kayo.
Inpakaammo ni Pedronan nga adda dagiti nadadael iti benneg ti agrikultura ngem saan da pay a makaipaay ti naan-anay a detalye gapu ta manarimaan paylaeng ti panagukkon da kadagiti datos tapno maamoan ti pakabuklan ti balor dagiti nadadael ken no mano dagiti mannalon a naapektaran.
Innayon na pay a manarimaanen ti panangisagana da kadagiti family food packs a maibunong kadagiti naapektaran a residente.
Kabayatanna, inbalakad ni Pedronan nga iti baet a nakatalawen ti bagyo ditoy probinsya ket saan koma paylaeng a dagus a tumappog iti baybay dagiti mangngalap tapno mapanda agkalap.
