LAOAG CITY – Nagballigi dagiti kameng ti Philippine National Police nga indaulwan ni Police Major Sheryl Guzman, ti chief of police iti ili ti Pasuquin, iti naisayangkat nga anti-illegal drug buy-bust operation iti Barangay 12, Puyupuyan ti nadakamat nga ili.
Nabigbig ti subject ti operasyon a ni Jaylord Sahagun, agtawen ti 38, awanan ti asawa ken residente iti Barangay Mangato-A ditoy ciudad ti Laoag.
Kinemmeg a dagus dagiti otoridad ti suspek kalpasan a naglako ti maysa a sachet a naglaon ti maipagarop a shabu nga agbalor ti 7 ribo a pisos.
Malaksid iti daytoy, nakumpiskar pay dagiti otoridad iti ikot ti suspek ti 14 a sachet a naglaon ti maatap a shabu ken ti maysa a bala ti caliber 22 a paltog.
Segun ken ni Police Major Guzman, ti suspek ket dati a balud iti New Bilibid Prison gapu iti kaso a panagrames ken murder, ngem nawaya-wayaan daytoy iti babaen ti probation and parole.
Innayon ni Guzman nga idi Marso 2, 2020 ket naarestar manen ti suspek gapu iti panagsalungasing na iti Republic Act 9165 wenno ti Comprehensive Dangerous Drugs Act of 2002 ken naulit ti pannakaarestar na idi Setyembre 26, 2020 gapu iti kaso a panaglabsing ti section 11 ti Republic Act 9165 ken extortion.
Iti agdama ket nagtalinaed ti suspek iti kustodyar ti Philippine National Police iti ili ti Pasuquin ken sumango iti kaso a panaglabsing iti iti panagsalungasing na iti Republic Act 9165 wenno ti Comprehensive Dangerous Drugs Act of 2002.
