LAOAG CITY – Natiliw ni Jonel Ariola, agtawen ti 35, ex-convict ken taga barangay Elizabeth, Dingras, Ilocos Norte ngem agdama nga agnanaed iti maysa nga apartment na iti Barangay 1, San Nicolas, Ilocos Norte iti drug buy-bust operation nga insayangkat ti nagtitipon a pwersa ti Provincial Drug Enforcement Unit (PDEU), PNP-Laoag ken PNP-San Nicolas.
Kinumpirmaran ni Ariola a karuruwar na laeng iti pagbaludan idi Mayo ita a tawen gapu ti kaso na nga illegal a droga.
Rumrumuar a naglako ni Ariola ti maysa a sachet a naglaon ti maipagarop a shabu nga agbalor ti sangaribo a pisos ken naala pay iti ikot na ti maysa a pouch nga agmaris ti asul a nakaipalaunan ti dua nga heat sealed plastic sachet ken dua a pedaso a residue.
Mamati ni Ariola a love triangle ti makagapu a naisayangkatan ti operasyon, ngem saanen a nangipaay ti naan-anay a detalye.
Kinumpirmaran ni Chief Master Sergeant Harold Nicolas iti Provincial Drug Enforcement Agency (PDEU) ditoy probinsya nga adda iti watchlist da ni Jonel Ariola.
Inlawlawag na a karuruwar laeng ni Ariolan iti pagbaludan idi Mayo ita a tawen ngem iti panangmonitor da kenkuana ket napaneknekan a saan latta a nagsardeng iti illegal nga aktibidad na.
Sinungbatan met ni Nicolas ti nagbalin a rakurak ni Ariola a saanna a bagi ti pouch a nagyanan dagiti illegal a droga.
Inpetteng na a naipagagangayen a kastoy ti ibagbaga dagiti matiltiliw da ngem iti laengen korte ti pangibagaan da.
Inbatad pay ni Nicolas a ti dakdakamaten ni Ariola a nangpatiliw kenkuana a karibal na ket adda met laeng ti pannakainaig na iti illegal nga aktibidad.
Inpasingked na a saanda nga agtiliw no saan da a mapaneknekan ti illegal nga aktibidad dagiti isayangkatan da ti operasyon.
