LAOAG CITY – Inpetteng ni dati a Mayor Alexander Calucag iti ili ti Solsona nga awan ti ammo na maipanggep iti babai a nangakusar ken ni Mayor Joseph de Lara a nangiggem ti barukong na.
Sungbat daytoy ni Calucag iti nagbalin a rakurak ni de Lara nga adda ti maris pulitika na ti alegasyon kenkuana gapu ta maipagarop a ti babai ket nakibonding iti dati a mayor iti nasao nga ili.
Inlawlawag iti Bombo Radyo ni Calucag a ti laeng nakabonding ken napan iti balayda ket dagiti classmates na gapu ta simmangpet ti maysa nga aggapo idiay Hawaii.
Segun ken ni Calucag, saan a rumrumuar gapu ta saan a makapagna kalpasan a natamaan ti spinal cord na a nakaospitalan na ti 14 nga aldaw idiay Manila.
Inpetteng ti dati a mayor a kalpasan ti termino na ket immayen nagnaed ditoy ciudad ti Laoag gapu ta isumet ti dati a pagnanaedan na manipud natambang idiay ili ti Solsona.
Innayon ni Calucag nga awan ti sabali a tututukan na iti agdama no saan a ti pakaseknan ti salun-at na.
Inbalakad pay ni Calucag ken ni de Lara a masapol a sungbatan na lattan ti alegasyon kenkuana ken saanen a mangiraman wenno mangparnuay ti sabali nga isyu.
