LAOAG CITY – Mamati ni dati a Senate President Franklin Drilon a saan nga agbalin a problema no abogado dagiti senador wenno saan iti panagtugaw da kas husgado iti impeachment court.
Segun ken ni Drilon, saan a napateg ti legal background tapno maamoan dagiti senador ti trabaho da ken sumurot iti rules wenno pagannurutan nga ikedkeddeng ti Senado, agpada a kas legislative body ken kas maysa nga impeachment court.
Komento daytoy ni Drilon kalpasan a napagsaludsudan iti kontrobersiyal a rakurak ni Sen. Rodante Marcoleta maipanggep iti kaawan ti legal background’ ni Sen. Risa Hontiveros, ken ti implikasyon daytoy iti namnamaen a trial laban kontra ken ni Vice President Sara Duterte.
Segun iti dati a Senate President, ti disenyo ti sistema iti impeachment proceedings ken uray iti legislative proceedings ket nabukel iti wagas a saan a kasapulan ti law background wenno nagturpos iti abogasya.
Nagtalinaed ti takder ni Drilon nga uray awan ti legal background, maaramid dagiti senator-judge nga annungen ti trabaho ken obligasyon da, agpada kas agpanpanday linteg ken kas husgado.
Mamati met ni Drilon a saan a napateg no nakurang ti background mainaig iti konstitusyon ti maysa a senador, basta nakasagana a makasursuro ken napudno iti sinapataan na a trabaho.
Innayon na a mabalin a maala dagitoy dagiti adviser a mangiwanwan kadakuada tapno masigurado a dagiti ar-aramiden wenno desisyon da ket maiyataday iti konstitusyon.
