LAOAG CITY – Inyetnag ni Gobernador Matthew Marcos Manotoc ti Executive Order No. 138-21 wenno ti pannakaipatungpal ti nayun nga health protocols ditoy probinsya tapno malappedan ti panagwaras ti covid-19.
Daytoy ket bayat nga iyur-uray ti probinsya ti sungbat ti Inter-Agency Task Force for the Management and Infectious Diseases (IATF-MEID) iti kiddaw a maipan iti babaen ti General Community Quarantine ti probinsya ng Ilocos Norte.
Basar iti EO, nailanad iti Executive Order a dagiti agtawen ti 15 ken agpababa kasta met dagiti agtawen ti 65 ken agpangato pakairamanan dagiti immunodeficiency, comorbidities, addaan ti sakit ken masikog ket naiget a mapawilan a rumuar kadagiti pagtaenganda.
Masapol a ti garaw ti tattao ket limitado laeng iti trabaho iti opisina wenno dagiti industriya a napulubusan nga agoperar, awan ti ad-ado ngem lima iti maysa a grupo ti agpupulapol.
Masapol met a maiyestablisar ti barikada kadagiti barangay nga addan iti lockdown ken nasken nga adda ti pass slip iti maibilang a critical barangays.
Ti Curfew Hours ket mangrugi iti 10pm agingga iti 4am ken adda ti liquor ban.
No pay kasta, saan a karaman ditoy dagiti Health Workers, Hospital Personnel manipod iti pampubliko ken pribado.
Dagiti Barangay Officials, Barangay Tanod, kameng ti Philippine National Police, Bureau of Fire Protection ken dagiti maibilang nga APOR wenno Authorized Person Outside Residence ket mapalubusan nga agtrabaho kabayatan iti curfew hours.
Kabayatanna, iti biang ti Public ken Private Transportation, ti tricycle ket maysa laeng ti mabalin a pasahero ken awan ti backride.
Kadagiti Jeepney ken Public Utility Bus ket masapol a 50 a porsiento laeng ti kapasidad ken dagiti taxi ket dua laeng a pasahero ti aglugan.
Kabayatanna, saan a mapalubusan nga agoperar dagiti entertainment venues nga addaan ti live performers kas iti karaoke bars, clubs, concert halls ken theaters.
Pakairamanan ditoy ti internet cafes, billiard hals, amusement arcades, casinos, horse racing, cockfight arenas ken dadduma pay a gaming establishment malaksid kadagiti aprubado ti IATF wenno ti opisina ti presidente.
Naamoan a manipod iti unofficial data ti Provincial Department of Health, ti Average Daily Attack Rate ditoy probinsya ket 16.64, maibilang nga high ken ti 2-week growth rate ket 92.89, maibilang met kas medium.
