LAOAG CITY – Napirmaanen ni Mayor Michael Marcos Keon ti executive order MMK-011 series of 2020 wenno dagiti guidelines a nasken a masurot tapno malappedan ti panagwaras ti coronavirus disease 2019 wenno COVID-19.
Babaen ti daytoy, na-activate ti City Disaster Risk Reduction and Management Office ken ti City Health Office nga agoperar iti 24/7.
Agsursur met dagiti pannakabagi ti barangay health workers response team kadagiti pagtaengan dagiti bumarangay kangrunaan kadagiti simmangpet a naggapu kadagiti lugar nga apektado ti COVID-19.
Basar iti dukomento a pinirmaan ni Keon, nasken a limitado ti garaw ti publiko agraman dagiti lugan.
Naipatungpal pay ti curfew manipud iti alas otso ti rabii agpatingga iti alas singko ti bigat.
Naibilin pay ditoy ti panagtrabaho dagiti empleyado ti gobyerno kas skeletal workforce manipud iti Lunes agingga iti Biernes iti alas otso ti bigat agpatingga iti alas singko ti malem gapu ti code red sub-level 2 status.
Iti merkado publiko ditoy siudad ti Laoag, temporaryo nga awan pay laeng ti night market, open market, mairekep ti parlor, flower shop, dry goods section ken karinderia iti uneg ti tiyendaan.
Nasken nga adda ti nakasagana nga alchohol wenno sanitizer nga aramaten dagiti tattao sakbay a sumrek da kadagiti nagduduma nga establisimiyento.
Mabalin met nga agoperar dagiti water refilling stations, manufacturing sector, LPG ken hardware distributors, ngem nasken a suruten da dagiti guidelines tapno malapdan ti panagwaras ti nasao a virus.
Saan a naipawil iti panaggatang kadagiti mainom ngem naipawil iti panaginom ti nasanger iti pampubliko a lugar ngem ketdi naipalubos ti uminom iti uneg ti pagtaengan.
Naipawil kadagiti restaurants ken dadduma pay a pasdek panganan ti mangidasar ti mainom a nasanger kadagiti kustomer.
Namandar met ti Business Permit and Licensing Office ken Department of Trade and Industry a mangmonitor ti presyo dagiti kangrunaan a magatgatang kas ti alchoho;, sanitizer, face mask ken dadduma pay.
Nasuspenso pay ti pannakaipatungpal ti road clearing operation kadagiti barangay ditoy siudad ti Laoag.
Basar iti pammilin ti mayor, naipawil pay iti panangiwaras ti palso a damag ken makita dagiti updates seknan ti sitwasyon gapu ti COVID-19 iti City Government of Laoag Page ken iti Communication and Media Affairs Office Page.
