LAOAG CITY – Nangiruar ti maysa a fashion brand idiay France ti nabirngasan a Lightest Handbag a naaramid iti “aerogel” ti kalag-anan a solid material iti intero a pagilian.
Tinawen a mangiruruar ti French fashion brand a Coperni kadagiti nagduduma a version ti Swipe bag-da.
Idi 2023, nagaramidda ti limited edition daytoy a naaramid manipud iti maysa a bulalakaw.
Adu ti nangipagarup nga awanen ti makaartap iti naidumduma a bag ngem nakapanunot manen ti Coperni ti ad-adda a naidumduma a version daytoy.
Idi 2024, nakikoordinar ti Coperni ken ni Ionannis Michaloudis, maysa a Greek researcher ken visual artist tapno agaramid ti handbag nga aramid ti aerogel.
Ti aerogel ket maysa nga espesial a klase ti materyal nga am-ammo iti panagbalin a nalag-an ken nakababbaba a density.
Daytoy ti kalag-anan a solid material iti intero a lubong gapu ta naaramid daytoy iti 99 percent of air ken 1 percent glass.
Maus-usar daytoy nga spacesuit dagiti astronaut ken thermal insulation kadagiti pagtaengan ken pasdek.
Gapu iti ultra-light material daytoy, nakadisenio ni Michaloudis ti maysa a kalag-anan a bag nga addaan ti kadagsen laeng a 37 grams.
Naammoan nga uray ti materyal daytoy ket naaramid iti 99 percent air, kabaelan daytoy ti pressure ti 4,000 times ti kadagsen ken saan daytoy nga madadael uray mapudutan ti 1,200 degrees Celsius.
Immunan nga inpakita daytoy ti Coperni iti maysa a runway show idi Paris Fashion Week ken sipod idin nagbalin a napagsasaritaan iti lubong ti fashion.
