LAOAG CITY – Dakkel a makatulong dagiti fashion shows tapno maitandudo ti industria ti inabel ditoy probinsia ken maipannakkel ti aramid dagiti lokal a designers.
Daytoy ti inbatad ni Ira Baylon, maysa a local designer kalpasan ti pannakaiwayat ti fashion show iti maysa a dakkel a mall ditoy siudad ti Laoag.
Segun kenkuana, daytoy ti kaunaan nga inabel fashion show a naisayangkat iti nasao a mall nga inorganisar ti dakkel a mall ken ti city government.
Inbatadna a gagangay nga iti social media laeng ti pakakitkitaan dagiti tattao kadagiti aramidda.
Inlawlawagna a babaen ti nasao nga aktibidad ket nakita ti publiko mismo a pisikal dagiti inabel creations-da.
Kunana a ti koleksionna a naitampok ket maaw-awagan nga street fashion wenno street wear a nagtipon a modern ken traditional.
Inpettengna a pinagtiponna daytoy tapno maipannakkel ti binakol product ti probinsia nangruna iti ili ti Sarrat ken denim wenno maong a ti konseptona ket no ania dagiti uso ita a mabalin nga isuot dagiti maibilang a Gen Z.
Inpakaammona a kalikagumda a maaprisiar dagiti Gen Z ti binakol wenno inabel ita a moderno a panawen.
Nairugi daytoy a konsepto idi 2023 apaman a nakisalip ti fashion design idiay Puerto Princesa, Palawan a maysa isuna kadagiti nangabak.
Ti fashion show ket naiwayat iti dakkel a mall ditoy siudad ti Laoag a nakipartisiparan dagiti Ilocano designers kas kada Albert Wong, Jomelyn Tolentino, Ira Baylon, Marjorie Lorenzo Sabanal ken Arnel Esteban.
Malaksid iti daytoy, adda pay ti pottery workshop a naisayangkat nga inorganisar ti dakkel a mall.
Segun ken ni Ms. Gab de Luna, Information Officer, dagiti nakipaset ket Grade 7 ken Grade 8 students manipud iti Ilocos Norte National High School ken dagiti nangbayabay kadakuada ket ti local artist a ni Dennis Tolentino.
Inbatadna a ditoy a naisuro dagiti basic hand-building pottery techniques ken pannakapartuat ti nagduduma a disenio babaen ti clay.
Kunana a babaen daytoy nga aktibidad ket maitandudo ti local culture, heritage appreciation ken youth creativity.
Mangnamnama ni de Luna nga ad-adda pay a mapapintas ti cultural connection ken artistic expression iti sumaruno nga henerasion.
