LAOAG CITY – Nasukatanen ti fire marshall ti Bureau of Fire Protection (BFP) ditoy ciudad ti Laoag a ni Fire Chief Inspector Roxanne Parado gapo ta nalpasen ti dua a tawen a panagbalin na kas mangidaulo ti nasao nga ahensya iti dua a tawen.
Ngumato ni Parado ken isuna itan ti agdama a Provincial Deputy Director ti BFP ken ti sumukat kenkuana kas Acting City Fire Marshall ditoy ciudad ket ni Fire Senior Inspector Ronald Castillo, dati a Municipal Fire Marshall ti San Nicolas.
Segun kenni Castillo, ita nga aldaw ti panangrugi ti serbisyo na ditoy ciudad ti Laoag ken itultuloy na dagiti programa ken proyekto nga inrugi ken indaulwan ni Parado kas iti Education Campaign.
Nagcourtesy call met ni Castillo kenni Mayor Michael Marcos Keon kageddan met ti panagpakada ni Parado iti mayor.
Mainaig iti daytoy, kuna met ni Fire Supt. Floro Obrero, ti Provincial Fire Marshall a ti met sumukat kenni Castillo iti BFP iti ili ti San Nicolas ket ni Fire Inspector Ronald Aguinaldo manipud iti ili ti Burgos.
Ti met sumukat kenni Aguinaldo ket ni SFO2 Alvin Andres manipud iti BFP-Dumalneg ken ti sumukat met kenni Andres ket ni SFO1 Gilbert Domingo iti ili met laegng ti Burgos.
Innayon na a ti reshuffling dagiti kameng ti BFP ditoy Ilocos Norte ket mandar manipud iti Regional Office ti nasao nga ahensya.
