LAOAG CITY – Nagbaliktad ti ferry boat dagiti turista no sadinno nga adda ti 89 nga indibidual ti nakalugan iti kabaybayan ti Nusa Lembongan, Bali kalpasan nga adda ti dakkel a dalluyong.
Basar kadagiti otoridad, tumalawen ti ferry boat nga agturong iti Sanur agaraup alas-4:30 ti malem idi bimmaliktad daytoy.
Iti bidyu a nagwaras iti social media, makita nga agpupukkaw dagiti tattao kabayatan a pilpilitenda a buongen dagiti tawa tapno makaruar dagitoy.
Naammoan a sumagmamano kadakuada ket limmagto pay iti baybay idinto a dagiti adda iti asideg a bangka ket insigida a timmulong babaen ti tali.
Iti pakabuklan, 77 kadagiti pasahero ket gangannaet ken 12 ket Indonesian nga amin dagitoy ket naisalakan nga agarup ala-6:30 ti rabii ken awan ti naipadamag a pimmusay wenno nagsagaba ti nakana a sugat.
Kabayatanna, temporario a naipatulod dagiti divers tapno masigurado nga awan ti nabati a biktima iti sirok ti ferry boat kalpasan a nagbaliktad.
