LAOAG CITY – Inparuk-at ti Philippine Statistics Authority (PSA) ti baro a datos manipod iti 2025 National Demographic and Health Survey (NDHS) a mangipakpakita iti agtultuloy a panagbaba ti fertility rate dagiti babbai a Pilipino iti 1.7 nga anak ti kada babai, ti kababaan a nairekord iti lebel ti pakasaritaan.
Manipod iti 4.1 nga anak ti kada babai idi 1993, agtultuloy ti panagbaba ti fertility rate iti napalabas a dekada.
Iti agdama, nababbaba daytoyen iti replacement level a 2.1 a kasapulan tapno mapagtalinaed ti agdama a populasyon, a mangitunda kadagiti saludsu no kasanu a padur-asen ti populasyon iti pagilian iti masangwanan.
Basar iti survey ti ahensya, bimmaba ti fertility rate iti agpada nga urban ken rural a lugar, no sadinno a dagiti babbai kadagiti ciudad ket addaan ti average a 1.5 nga anak, idinto a dagiti adda iti rural a komunidad ket addaan met ti 2.0 nga anak.
Kangatoan ti fertility rate iti Bangsamoro Autonomous Region in Muslim Mindanao a 2.4 nga anak ti kada babai, sumaruno ti Region IV-A (1.3), National Capital Region, ken Negros Island Region (1.4).
