LAOAG CITY – Agpaut iti uneg ti tallo nga aldaw ti pannakaisayangkat ti FIBA Naismith Trophy Tour ditoy Ilocos Norte.
Inlawlawag ni Mr. Cipriano “Perry” Martinez nga uppat a lugar ditoy Pilipinas ti pakaipasyaran ti nasao a Trophy kalpasan a naisursur iti nadumaduma a paset ti lubong.
Imbatadna a manipud idiay China ket agturong ti grupo ti FIBA idiay Davao, sumaruno ti Cebu, Metro Manila ken kalpasanna ditoy Ilocos Norte para iti pannakaipasiar ti nasao a Trophy.
Segun kenkuana, maisayangkat daytoy bayat ti panagsagsagana ti Pilipinas nga ag-host iti 2023 FIBA Basketball World Cup a mangrugi iti masungad nga Agosto 25.
Inbunannagna a nagasat ti Ilocos Norte ta maikkan ti gundaway dagiti kakailian a makakita iti FIBA Naismith trophy.
Kunana nga agcourtesy call ti grupo iti opisina ni Gob. Matthew Marcos Manotoc ken iti opisina ni Bise Gob. Cecilia Marcos intono Agosto beinte uno ken kalpasanna ket maipan ti tropio iti Robinsons Mall ti ili a San Nicolas tapno maikkan ti gundaway dagiti kakailian a makiretrato iti grupo dagiti taga FIBA pakairamanan ti tropio.
Inpakaammo ni Martinez a manamnama a sumurot iti grupo ti FIBA dagiti sumagmamano a dati nga umaayam ti Gilas Pilipinas ken ti Barangay Ginebra a kas ken ni LA Tenorio.
Nupay kasta, impalgakna nga awan pay ti pannigurado no makasurot ni Tenorio iti nasao a grupo nupay naipasiguradon ti iyuumay ni Gary David.
Innayonna a manamnama ti pannakaipaay ti gundaway kadagiti kameng ti media a makainnuman iti grupo ti FIBA nga umay ditoy probinsia.
