LAOAG CITY – Dumanonen iti pakabuklan nga 655 ti bilang dagiti nairekord a fireworks-related injuries iti intero a pagilian gapu iti paputok idi selabrasion ti paskua ken baro a tawen basar iti Department of Health (DOH).
Daytoy ket iti baet ti agtultuloy a panagkalap dagiti datos ti Department of Health-Epidemiology Bureau no sadinno a nairekord manipud idi Disiembre 21, 2025 agingga iti Enero 3, 2026 ti pakabuklan a bilang, 351 kadagiti biktima ket agtawen ti 19 ken agpababa ken amin dagitoy ket nagsagaba kadagiti nagduduma a klase ti sugat.
Basar iti datos ti ahensia, 19 nga indibidual ti napukawan ti ima ken ramay no sadinno 11 ditoy ket menor de edad.
Naammoan a ti kaubingan a biktima ket agtawen ti uppat a napukawan ti ramay iti akinkannawan nga imana.
Kaaduan kadagiti kaso ket manipud iti saan a masinunuo a klase ti paputok gapu ta saanen a malagip dagiti biktima ti inusarda.
Simmaruno ditoy dagiti insidente gapu iti kwitis (sky rocket) ken ti ilegal a 5-star.
Nupay kasta, inbatad ti Department of Health ti agdama a bilang ket 20 a porsiento a nababbaba maidasig iti nairekord a 819 a pakabuklan a kaso idi Enero 3, 2025.
Nabalakadan ti publiko nga insigida nga itaray iti kaasitgan nga ospital ti asinoman a maputukan ti paputok tapno makaala ti libre a bakuna ken maliklikan ti tetanus a kasapulan a maipaay iti uneg ti 8 agingga iti 21 nga aldaw.
