LAOAG CITY – Inrakurak ni United States Defense Secretary Pete Hegseth a mailukat iti ipubliko ken maiparuk-at iti livestream ti pannakaipatungpal ti dusa a patay kontra iti dati nga US Army psychiatrist a ni Nidal Hasan a nangpatay ti 13 a tattao iti Fort Hood military base idi 2009.
Maipatungpal ti execution iti babaen ti firing squad intono Disyembre 3 iti oras ti ala-una ti malem iti mismo a Fort Hood idiay Texas, ti eksakto nga oras ken lugar a nakapasamakan ti pammaltog.
Inkalintegan ni Hegseth ti desisyon ken inpetteng na a masapol a makita ti publiko ti proseso tapno maipakita ti nadagsen a pagtungpalan dagiti kastoy a klase ti krimen, kalpasan nga inaprubaran ni President Donald Trump ti panagusar ti firing squad.
Nasentensyaan ti dusa a patay ni Hasan idi 2013 gapu iti 45 a bilang ti premeditated murder ken attempted murder kalpasan a nagpalto-paltog iti uneg ti pasilidad ti militar kabayatan nga ipukpukkaw na ti “Allahu akbar.”
Daytoy ti kaunaan a gundaway iti pakasaritaan ti Estados Unidos nga ipabuya iti telebisyon wenno online ti pannakabitan ti maysa a federal wenno militar idinto a naudi a nagusar ti US military ti firing squad para iti dusa a patay idi 1945.
