LAOAG CITY – Kinumpirmaran ti Department of Health a nakastreken ditoy pagilian ti FLiRT variants ti COVID-19.
Iti kaudian a datos ti sequencing data ti University of the Philippines-Philippine Genome Center (UP-PGC), nakairekorden ti Pilipinas ti dua a kaso ti KP.2, a karaman iti maaw-awagan a FLiRT variants.
Malaksid iti daytoy, adda ti nairekordda a 30 a kaso ti JN.1 ken dua a kaso ti JN.1.18 agingga iti napalabas a bulan.
Inbatad ni Department of Health Assistant Secretary Albert Domingo a ti kasapaan a sample collection date para iti KP.2 iti pagilian ket nairekord idi Mayo 2024.
Kunana a mabalin nga adda ti KP.2 cases nga immun-una a nairekord ngem gapu iti limitado a sequencing ket saan a dagus a na-detect dagitoy.
Basar iti Department of Health, adda ti uppat a variants under monitoring (VUM), karaman ditoy ti JN.1.7, JN.1.18, KP.2 ken KP.3 nga agpapada a descendants ti JN.1, a maysa a variant of interest a responsable iti panagngato dagiti kaso ti impeksion iti umuna a paset ti tawen.
Inlawlawag ti Department of Health nga awan pay ti ebidensia a ti KP.2 ken KP.3 variants ket mangitunda ti severe to critical COVID-19, locally man wenno internationally.
