BOMBO LAOAG – Natay ti maysa foreman idinto nga uppat dagiti nasugatan, karaman ti maysa a masikog ken dua kadagitoy ti nagtalinaed nga awan poot na iti ospital kalpasan ti panagdinnungpar ti maysa a motorsiklo ken kurung-kurong iti manila-north road bisinidad iti Barangay 22, San Guillermo, San Nicolas, Ilocos Norte.
Segun ti PNP, bayat nga agpapa-amyanan a direksyon ti kurung-kurung nga inturong ni Jay-ar Rios, agtawen iti 24, addaan ti live-in partner, inlugan na da Ronaldo Españero, agtawen iti 32, naasawaan, Dennis dela Cruz, Rolly Campilla kenni Dante Capilla, agtawen iti 36, agpapada dagitoy a residente ti Barangay Sabangan, Santiago, Ilocos Sur ket nakadinnungpar na ti motorsiklo nga inturong ni Mark Christoperson Dela Cruz, agtawen iti 30, taga Barangay 27 iti ili a Bacarra lubbon na ti live-in partner na a ni Cristine Mae Topacio, agtawen iti 23 ken taga Barangay Bingao iti ili a San Nicolas.
Agpapada a naitaray iti ospital dagiti nasao a biktima ngem pimmusay bayat a maag-agasan ni Rolly Campilla, foreman gapu kadagiti sinagaba na a nakana a sugat a nakatukkulan pay iti dua a saka na idinto a dagiti nagtalinaed nga awan ti poot na ket da Dennis dela Cruz ken ti nangiturong ti motorsiklo a ni Mark Christoperson Dela Cruz.
Naamoan a dagiti nakalugan ti kurung-kurong ket agpapada nga agtrab-trabaho iti Black Nazarene Hospital kas construction worker.
Iti inisyal nga imbestigasyon, ken napan naki-birthday dagiti construction worker kalpasan na ket possible a napan da pay laeng naggiinum iti maysa a videoke bar sakbay nga agawid da koman idi napasamak ti insidente.
Awan met unay ti sinagaba a sugat ti masikog a live-in partner ti nangiturong ti motorsiklo a ni Cristine Mae Topacio.
Agtultuloy iti imbestigasyon dagiti otoridad seknan ti nakaam-ames a desgrasya iti ili a San Nicolas.
