LAOAG CITY – Nasanudan ti forward truck a nagkarga kadagiti sinako a mais ti maysa a pagtaengan iti Barangay 22, San Cristobal iti ili ti Sarrat.
Segun ken ni P/Cpt. Ashley Cacayorin, Hepe ti Sarrat Municipal Police Station, nabigbig ti driver ti forward truck a taga ili ti Dingras ken adda ti 10 a dadduma pay a kaduana a nakalugan iti daytoy.
Inbatadna a basar iti inwayatda nga imbestigasion, kabayatan dumaldalyasat nga agpangpangato ti forward truck nga agturong nga agpa-laud ket kellaat a naaddaan ti mechanical failure ti lugan a nangitunda ti pannakapukaw ti kontrol ti manibela ti driver agingga a nasanudanna ti pagtaengan nga adda iti igid ti national highway.
Inlawlawagna nga agdagsen ti sumurok-kumurang 12 a tonelada ti karga ti forward truck no sadinno a 10 a tonelada laeng koma ti maipalubos nga ikargana.
Kunana a ti forward truck ket naggapu iti ili ti Solsona ken agturong koma iti ili ti Dingras.
Mainaig iti daytoy, basar iti pannakisarsarita dagiti otoridad iti akinkukua ti nadadael a balay, ti nakaidungparan ti forward truck ket masansan nga isu ti paglablabaanda ken masansan nga adda pay ti ubing nga agay-ayam.
Inpettengna a naisyuan ti citation ticket ken mapilaan ti kaso a reckless imprudence resulting in damage to property ti nangiturong ti forward truck.
Innayonna nga awan ti nadangran iti napasamak a disgrasia.
Iti agdama, manarimaan pay laeng ti imbestigasionda maipanggep iti pakabuklan a balor iti pannakadadael ti nasao a pagtaengan.
Kabayatanna, bayat a maisursurat daytoy a damag ket saan pay a naiyakar dagiti sinako a mais ken saan pay a naikkat ti forward truck.
