LAOAG CITY – Agtalinaed a nakabalud iti The Hague ni dati a Presidente Rodrigo Duterte kabayatan a maiyur-uray ti panangrugi ti panangusig kenkuana mainaig iti kaso a crimes against humanity basar iti International Criminal Court (ICC).
Basar iti desision ti International Criminal Court Trial Chamber III, saan nga umdas dagiti insubmitir nga argumento ti depensa maipanggep iti salun-at ni Duterte tapno sukatan ti immunan a findings ti court-appointed medical experts.
Inpetteng ti korte nga awan ti baro nga ebidensia wenno dakkel a panagbalbaliw iti situasion ti salun-at ti dati a Presidente a mangipaay ti rason tapno temporario isuna a waya-wayaan.
Inpaganetget ti International Criminal Court ti panagkedkedna a bigbigen ti hurisdiksion ti korte a mangipakpakita a mabalin a saan a sumurot isuna iti aniaman a pammilin ti korte no mawaya-wayaan.
Kuna ti International Criminal Court nga adda ti “real and substantial risk” a mabalin daytoy nga aglibas wenno lappedan ti proseso ti hustisia gapu iti impluwensia ken koneksionna.
Mainaig iti daytoy, inikkan ti korte ti pammalubos ti depensa a saan pay laeng nga agatendar ni Duterte iti umuna nga status conference a naikeddeng inton Mayo 27 basta agisubmitir ti pormal a panagkiddaw.
