LAOAG CITY – Nasakit ti nakem ni Miss Stephanie Echanique iti Barangay Nagbacalan iti ili ti Paoay kalpasan a nabiktima ti online scam.
Inlawlawag na iti Bombo Radyo Laoag a fresh graduate daytoy ken kabayatan ti panagbirbiruk na iti trabaho ket nakita na iti facebook nga hiring ti Ilocos Hiring Job.
Inbaga na a nakita na ditoy ti post ti agnagan ti
Carla Shayne Corpuz manipod iti maysa a bangko nga agkasapulan da ti IT development rason a dagus na nga insumitir ti resume na iti nailanad a gmail add no sadinno nga iti kabigatan na ket nainterviewn a dagus.
Kuna na a naibilin kenkuana nga agdown ti 6 a ribo a pisos tapno maasikaso a dagus ti panag-medical bond na iti maysa nga ospital ditoy ciudad ti Laoag.
Immanamong met ni Echanique ken inpatulod na ti kwarta babaen iti Gcash.
Nupay kasta, awan ti nauray na a text manipod iti nadakamat nga ospital isut gapuna a nagturong tapno iberipikar na ngem ditoy a naamoan na nga awan ti nagan na iti ospital.
Kalpasan iti daytoy ket nagturong met iti nailanad iti post a bangko nga agkasapulan ti IT Development ngem naduktalan na manen a saan da nga hiring iti nasao a posisyon rason a napanunot na a nabiktima daytoy iti online scam.
Mainaig iti daytoy, inpakaammo na nga adda ti timmawag kenkuana no sadinno a naamoan na a nagbalin da met a biktima iti online scam a kas ti nagpasaran na ken ti nagan na ti inusar dagiti suspek.
Inbalakad ni Echanique kadagiti pada na nga agbirbiruk ti trabaho a saan a basta mamati iti makitkita iti internet ken mangnamnama a saanen a mapasaran ti sabali ti napasamak kenkuana.
Inabatad na pay nga inyuman nan daytoy a banag iti Philippine National Police (PNP) ken National Bureau of Investigation (NBI), ken mangnamnama a maduktalan wenno maamoan ti kinatao dagiti suspek.
