LAOAG CITY – Inbatad ni Police Lt. Col. Percival Pineda, ti baro a pannakangiwat ti Ilocos Norte Police Provincial Office (INPPO) nga adda ti maysa a kameng ti PNP a pimmusay idi parbangon ti Agosto 22 a nagpositibo ti covid-19 virus.
Segun ken ni Pineda, ti pimmusay a pulis ket kameng iti Philippine National Police (PNP) iti ili ti Banna.
Inbaga na a ti pasyente ket fully vaccinated ken agdi-dialysis daytoy no sadinno a ti patienda a nakaalaan na ti virus ket iti met laeng mismo a dialysis center.
Kuna na a nakikoordinar dan iti lokal a gobierno iti ili ti Banna para iti contact tracing kalpasan nga adda pay ti sumagmamano a kameng ti pulisya iti nasao nga ili a nagpositibo ti covid-19.
Gapu iti kaado dagiti nagpositibo a kameng ti pulisya iti ili ti Banna ket nakalockdown ti nasao a kwerpo ti pulisya iti agdama.
Innayon na a nangipaay da metten ti tulong ni Regional Director/Police Brig/Gen Emmanuel Peralta ken ni Provincial Director Christoper Abrahano iti pamilya ti pimmusay a pulis.
Malaksid iti daytoy, adda pay ti inted a tulong ti PNP iti intero a rehiyon uno ken dadduma nga ahensya.
Iti agdama ket adda ti 93 active cases iti PNP ditoy probinsya idinto a 190 dagiti naan-anayen a nakarekobre.
