LAOAG CITY – Nangipeksa ti nakaro a panagdanag ti Second Congressional Commission on Education (EDCOM 2) kalpasan nga inbutaktak nga agarup doblen ti bilang dagiti functional illiterate wenno dagiti Pilipino a marigatan nga agbasa ken agsurat manipud iti 14.5 milyon idi 1990s ket nagbalin a 24.8 milyon idi 2024.
Iti panagdengngeg ti Second Congressional Commission on Education mainaig iti pammilin ti Department of Education, rimmuar met a makipaspaset ti ahensia iti 261 nga interagency bodies a basar iti komision ket makaap-apektar iti kabaelan daytoy a matutukan ti krisis iti functional illiteracy.
Inbatad ni Education Secretary Sonny Angara, karaman ditoy dagiti 20 a konseho nga idadauluan mismo ti Department of Education ken 21 a dadduma pay a pagtintinnulungan ti Commission on Higher Education ken Technical Education and Skills Development Authority.
Dinakamat ti Second Congressional Commission on Education nga iti umuna a report daytoy, 63 laeng ti kastoy a konseho nga at-atendaran ti Department of Education nga adayo a nababbaba maidasig iti agdama a bilang.
Basar iti Functional Literacy, Education and Mass Media Survey (FLEMMS) 2024, ti functional illiteracy ket kinakurang ti kabaelan a mausar ti panagbasa ken panagsurat iti inaldaw-aldaw a situasion.
Inlawlawag ni Second Congressional Commission on Education Executive Director Karol Mark Yee a manaynayonan ti trabaho dagiti mangisursuro gapu kadagiti baro a linteg a mangibilbilin kadakuada dagiti responsibilidad a saan a panangisuro kas ti vision screening (RA 11358), panangtulong iti 4Ps (RA 11310), feeding programs ken panagbalin a Disaster Risk Reduction Coordinator (RA 10121).
Gapu iti daytoy, makiskissayan ti oras dagiti mangisursuro iti aktual a panangisuro ken bumabbaba ti kalidad ti pannakaisuro kadagiti estudiante.
Dinakamat pay ti Department of Education a gagem a maaddaanda ti maysa nga administrative officer (AO) iti tunggal pampubliko a pagadalan sakbay nga agngudo ti 2026 tapno makissayan ti kinadagsen ti non-teaching workload.
Kuna ni Angara, nagtalinaed a dakkel a karit ti kinakurang ti pundo iti pannakaipatungpal kadagiti linteg iti edukasion kas ti Alternative Learning System (ALS), Academic Recovery and Accessible Learning (ARAL) Program ken Mental Health and Well-Being Promotion.
Inlawlawagna a mapattapatta a dumanon iti sumurok ₱1 trilyon ti kasapulan a pundo no ipatungpal a maminpinsan dagiti amin a linteg iti edukasion.
Kabayatanna, inpasigurado ni Sen. Loren Legarda a suportaranna ti nayon a pundo para iti Alternative Learning System ken edukasion dagiti katutubo (IP Ed).
