Saan pay a masinunuo nu mano dagiti nasugatan ken ti total a bilang dagiti natay iti napasamak a gas explosion idiay Abu Dhabi, UAE.
Segun ken ni Bombo International News Correspondent Marcial Perpetua iti Abu Dhabi ken tubo iti Cavite, adda kadagiti nagduduma nga ospital dagiti nasugatan.
Inbatad na nga adda dagiti Pilipino a nagsagaba ti sugat malaksid kadagiti dua a pimmusay.
Inpakaamo na a ti maysa a Pilipino a natay ket lalaki nga OFW ken tubo iti Surigao idinto a ti maysa ket babae a cashier iti mismo a restaurant a nakapasamakan ti panagbettak.
Kabayatanna, kuna ni Perpetua a basar kadagiti otoridad, saan a panagatake dagiti terorista iti napasamak a panagbettak gapu ta daytoy ket isolated case nu sadino nga adda ti nagbalin a misalignment iti gasline ti restaurant.
Mainaig iti daytoy, kuna na a nagkari ti embahada a mangipaay ti tulong iti pamilya dagiti pimmusay a Pilipino.
Immunan a kinumprimaran ti Department of Foreign Affairs a dua dagiti natay a Pilipino iti napasamak ti panagbettak iti maysa a restaurant Sheikh Rashid Bin Seed Road, Abu Dhabi.
