LAOAG CITY – Nagsubli dagus iti panagsanay ti Gilas Pilipinas kalpasan ti pakasaritaan a panagballigida iti New Zealand ti second window ti FIBA Asia Cup Qualifiers.
Inbatad ni Gilas coach Tim Cone nga awan ti panagbalbaliw iti naiget a panagsagsagana nga ar-aramidenda iti panagsangoda iti Hong Kong inton Domingo.
Saanda nga agpakampante ken tagabassiten ti Hong Kong isu a no kasano ti panagsanayda kontra iti New Zealand ket ad-adda pay a paigetanda.
Inlawlawagna nga adda dagiti sumagmamano a panagbalbaliw iti play ken rotation ti maipakat iti labanda iti Hong Kong.
Iti agdama, umun-una ti Gilas Pilipinas iti Group B kalpasan nga inabakna ti New Zealand idinto nga adda iti maikapat a puesto ti Hong Kong kalpasan nga inabak isuda ti Chinese Taipei.
