LAOAG CITY – Irekreklamo ni Ms. Maribel Formantes ti Xzell Roof Bending Services iti Barangay Buttong ditoy ciudad ti Laoag gapo ta umaboten iti dua a lawas dagiti ginatang na a construction materials ngem saan pay a naideliver.
Segun kenni Formantes, umabot iti 122 a ribo a pisos ti inbayad na kadagiti materyales ken inaldaw pay a mapmapan iti nasao a pasdek.
Nupay kasta, kunana a no dadduma ket aglemlemmeng pay ti agtagikua a binigbig na a Mr. Willfredo Balanay Jr. no mapan isuna iti pwesto na ken saan nga agsungbat ti tawag.
Saan a maawatan ni Mrs. Formantes no apay a saan pay laeng a maideliver dagiti ginatang na ken awan met ti palawag dagiti maseknan kenkuana a rason.
Inpetteng na a gapo iti daytoy ket mabasbasa dagiti kagamitan da iti pagtaengan da gapo iti pangtudtudo.
Kunana nga iresponsable ti agtagikua iti pasdek nangruna ket nagkari daytoy a maideliver da dagus.
Kalikagom ita ni Mrs. Formantes a maideliver dagiti materyales a binayadan.
