LAOAG CITY – Inlawlawag ni Bombo International News Correspondent Myles Beltran idiay Japan no apay nga ado dagiti mangkonkontra iti pannakaiyuswat ti state funeral para kenni dati a Prime Minister Shinzo Abe.
Segun kenni Beltran, karaman kadagiti rason no apay a makapungtot dagiti residente iti state funeral ket ti kadakkel ti gastosen ti Japan para iti daytoy.
Inbatad na a patien dagiti tattao ken rumrumuar nga impormasyon a saan nga adayo ti diperensya iti gastos ti state funeral ni Abe iti nagastos iti pannakaitabon ni Queen Elizabeth II.
Karaman pay a rason ket ti maipagarop a pannakairaman ni Abe kadagiti sumagmamano a kontrobersyal a desisyon ken iskandalo idi isuna pay laeng ti nakatugaw a prime minister.
Naamoan a karaman ditoy ti panangipaay ni Abe ti saan nga husto a pabor iti pulitiko ken panang-tengngel na iti ummuna a tawen ti pandemya.
Kabayatanna, kuna ni Beltran a sipud pay idi Sabado ket nagsangpeten dagiti sumagmamano a dignatarues nga agetander iti State Funeral ni dati a prime minister Shinzo Abe.
