LAOAG CITY – Ginasut a pasahero ti naistranded iti Jomo Kenyatta International Airport (JKIA) iti Nairobi idiay Kenya gapu iti panangipatungpal ti tignay-protesta dagiti empleado kalpasan nga addan ti plano a maipaima ti nasao nga erupuerto iti Indian business group.
Gapu iti panangiyuswat ti tignay protesta dagiti empleado iti erupuerto ket naitantan ken nakanselar dagiti flights.
Ipetpetteng dagiti aviation workers union a ti katulagan ket narigat nga awaten ken mabalin nga agtungpal iti pannakapukaw ti trabaho.
Nupay kasta, inkalintegan ti gobierno a saanen nga agop-operar a nasayaat ti erupuerto ken kasapulan ti private investment tapno ma-upgrade daytoy.
Iti agdama, maiyur-uray ti pinal a desisyon ti korte mainaig iti daytoy a banag.
