Maragsakan ni Dr. Ma. Teresita Orcino, Retired DepEd Supervisor iti ili a San Nicolas iti panangaprobar ti Kamara iti House Bill No. 5829 wenno iti pannakaisubli ti Good Manners and Right Conduct iti grade school curriculum.
Patien ni Orcino a dakkel a tulong ti GMRC a mangbalbaliw iti madi nga ugali dagiti ubbing saan laeng nga iti pagadalan nu diket iti pay pagtaengdan da.
Segun kenkuana, babaen iti daytoy ket maipasagepsep kadagiti ubbing ti napintas a kababalin.
Inlawlawag na nga “in passing” laeng iti pannakaisuro ti GMRC kadagiti ubbing agsipod ta awan iti nailatang nga oras a maisuro daytoy kas maysa a subject.
Naamoan a kalikagum ti nasao a gakat a mairaman ti GMRC iti K-12 program ken maisuro kas maysa a subject para kadagiti agad-adal iti kindergarten agingga iti Grade 3.
