LAOAG CITY – Inrakurak ni Speaker Ferdinand Martin Romualdez ti maysa a komprehensibo nga estratehia ti nagduduma a sangay ti gobierno tapno maipababa ti presio ti bagas kagiddan ti iparuk-at a direktiba ni Presidente Ferdinand Marcos Jr. a kissayan ti taripa a maipatpataw kadagiti imported a bagas.
Basar iti National Economic and Development Authority (NEDA), maysa nga executive order ti iparuk-at ni Presidente Marcos tapno maipababa iti 15 a porsiento ti taripa iti imported a bagas manipod iti agdama a 35 a porsiento. Gagema a maipababa iti P29 ti presio ti kada kilo ti bagas.
Inaramid ti lider ti Kamara ti rakurak kalpasan ti pannakitaripnongna kadagiti opisial ti Department of Agriculture (DA), Department of Trade and Industry (DTI), Bureau of Customs (BOC) ken dadduma pay nga stakeholders pakairamanan dagiti pribado a sektor.
