LAOAG CITY – Nangipaay ti 1 a milyon a pisos ti gobierno ti Davao City ditoy probinsya ti Ilocos Norte para kadagiti naapektaran ti Bagyo Ineng.
Segun ken ni Mr. Marcel Tabije, ti Local Disaster Risk Reduction and Management Officer IV, immay a mismo ti City Disaster Risk Reduction Management Officer ken ti nangibagi ti Treasurer’s Office ti Davao City tapno personal nga iyawatda ti nasao a gatad ken ni Gob. Matthew Marcos Manotoc manipod iti Davao City nga idadauloan ni Mayor Sarah Duterte-Carpio.
Inbatad na nga inpadanun ni Gobernador Manotoc ti panagyaman na iti Davao City kangrunaan na ken ni Mayor Sarah Duterte Carpio iti inpaayda a tulong ditoy Ilocos Norte.
Inbunannag ni Mr. Tabije nga adda pay dagiti sumagmamano a probinsia ken ahensia ti gobierno a nagikari met a mangted ti pinansyal a tulong ken relief goods ditoy probinsia.
Inpakaammona a ti inted a tulong ti ciudad ti Davao ket igatangda kadagiti kangrunaan a kasapulan dagiti biktima ti Bagyo Ineng pakairamanan dagiti Agricultural input wenno dagiti ramit a masapol dagiti mannalon gapu ta kaadduan kadagitoy ket nadadael iti idadalapos iti nasao a Bagyo.
Malaksid ti inted a tulong ti ciudad ti Davao ket nangted pay tu 1 a milyon a pisos ti maysa a Private Corporation (Energy Logic).
Immunan a nangipaay ti tulong pinansyal ti Gobierno iti Batanes, Puerto Princesa ken Tuguegarao City, pakairamanan ti Land Bank of the Philippines ken dagiti nasinged a papagayam ti pamilia Marcos.
Kabayatanna, inbatad ti Gobernador a nalpasen ti panagibunong kadagiti relief goods ngem agtultuloy pay laeng ti panagsangpet dagiti tulong manipod kadagiti nagduduma a lugar ditoy pagilian.
