LAOAG CITY – Inbatad ni Governor Cecilia Araneta-Marcos nga agsagsaganan ti gobierno probinsyal para iti pannakaipasdek ti Command Center ditoy probinsya.
Segun iti gobernador, nalpasen ti bidding para iti pannakagatang dagiti equipment wenno kagamitan a mausar para iti pannakaestablisar ti nasao a pasilidad.
Inpakaammo na a basar iti plano ket agasideg ti Provincial Disaster Risk Reduction and Management Office ken ti Provincial Social Welfare and Development Office gapu ta dagitoy ti dua nga opisina ti kangrunaan a maseknan iti panagresponde no adda ti kalamidad.
Innayon ti gobernador a kinataripnong na iti immuna a gundaway ni Department of Information and Communications Technology (DICT) Region 1 Regional Director June Vincent Manuel S. Gaudan no sadinno nga inkarina a tumulong para iti nasao nga addang ti probinsya.
