LAOAG CITY – Nangideploy ti Provincial Government of Ilocos Norte babaen ti Metro Ilocos Norte Council (MINC) ti nayon a “Libre a Pagluganan” jeepney units tapno mailugan dagiti healthcare workers, non-medical frontliners, ken medical patients.
Agarup 15 PUJS iti naideploy kadagiti pick up ken drop-off points ditoy probinsya kumpara iti immuna a 9 a PUJs iti naisayangkat a “Libre a Pagluganan” idi Marso 22.
Inbatad ni Mr. Perry Martinez, MINC Executive Director a ti nasao a programa ket masapul a tuloy-tuloy agsipod ta alisto laeng a mapno ti maysa a jeep gapu ta 50 a porsyento laeng ti maakomodar a pasahero.
Kunana a napili dagiti miyembro ti “Night Express” Program kas beneficiaries para ti libre a pagluganan.
Makaawat ti kada driver iti inaldaw a paggasolina ken P340.00 a sweldo.
Iti agdama, nasurok 5 ribo a frontliners ken agarup 300 a medical patients dagiti naipaayan ti libre a pagluganan.
