LAOAG CITY – Umaboten iti nasurok nga 6 a milyon a pisos ti naipaay a tulong ti gobierno probinsyal kadagiti naapektaran a residente iti nagsasaruno nga iduduprak ti Bagyo Crising, Dante ken Emong, karaman ti epekto ti abagat ditoy probinsya.
Segun ken ni Governor Cecilia Araneta-Marcos, nakikoordinar da iti Department of Social Welfare and Development tapno agkiddaw ti family food packs a maibunong kadagiti nakaro a nakapasar ti epekto dagiti kalamidad.
Kuna na a babaen ti Provincial Social Welfare and Development Office ket umabot iti 10 ribo a food packs ti naipaay kadagiti apektado a residente ditoy probinsya.
Inpakaammo ti gobernador nga agtultuloy ti pannakikoordinar ti gobierno probinsyal iti gobierno national para iti nayun a relief supplies ditoy probinsya.
Kabayatanna, nagyaman ti gobernador gapu ta awan ti nakaro nga epekto dagiti nagsasaruno a bagyo ditoy probinsya.
