LAOAG CITY – Nangipaay ti gobierno probinsial babaen iti Gender and Development wenno GAD ti regalo iti maika-100 millionth baby.
Inbunannag ni Mrs. Janet London, mangidadaulo ti Gender and Development ti Provincial Government of Ilocos Norte a naiyawat iti “100 millionth symbolic baby” ti sangapulo ribu a pisos iti sangoanan ti kapitolio probinsial.
Binigbigna daytoy a ni Princess Coleen de la Cruz a naipasngay idi Hulio 27 tawen 2014 ken taga Brgy. Mangato ditoy siudad ti Laoag.
Inbatadna a ti ina ti ubing ket ni Mrs. Rewelyn de la Cruz ken pimmusay ti amana gapu iti sakit ti puso sakbay pay a naipasngay.
Kunana nga iti agdama ket addan iti maikadua a tukad ti pagadalan ti ubing ken agad-adal iti Laoag Central Elementary School.
Inlawlawag ni London a ti pannakaipaay ti regalo iti nadakamat nga ubing ket kas suporta ti gobierno probinsial iti panangidaulo ni Gob. Matthew Marcos Manotoc iti nadakamat a “symbolic baby.”
Segun kenkuana, binigbig ti Population Commission wenno Popcom, siyam a tawenen ti napalabas dagiti maladaga a naipasngay iti nagdumaduma a paset ti pagilian idi Hulio 27 tawen 2014, ti aldaw a pannakadanon ti Pilipinas iti “100 millionth mark” iti populasyon.
Inpalgakna a sipud idin ket sinubaybayan ti Population Commission Regional Office iti tulong ti Gender and Development Office ti kasasaad ti salun-at dagiti “symbolic baby” kadagiti bukudda a lugar.
Innayonna a babaen iti isaysayangkat dagitoy a monitoring ket maammoan no ania ti kasapulan dagiti nadakamat nga ubbing a suporta iti benneg ti nutrisyon, edukasyon, serbisio ti salun-at ken dadduma pay a nasken a maipaay kadakuada ken iti pamiliada.
Kabayatanna, naammoan a malaksid ken ni Princess Coleen ket adda pay ti maibilang kas 100 millionth symbolic baby nga isuda John Paul ti Pangasinan, Ricobien Jacob, ti regional representative, Trixie Ann ti La Union ken Xyrus Jeic ti Ilocos Sur.
