LAOAG CITY – Maalarma ni Gob. Imee Marcos iti rakurak ti PAG-ASA nga adda posibilidad nga agingga iti bulan ti Disyembre a mapasaran ti nepnep.
Mainaig iti daytoy, impalgakna a saan na nga ammo no ania ti nasken a maaramid tapno saan a mapasaran ti panagbisin.
Nupay kasta, mangnamnama pay laeng ti gobernador a saanen nga agpaut ti nasao a kalamidad.
Iti baet daytoy, imbatad na a masapul ti panagplano a naimbag tapno adda ti alternatibo a pamataudan dagiti mannalon nga agserbi iti pamilya da.
Kunana nga adayo a narigrigat daytoy ngem iti bagyo gapu ta no agtalnan ti bagyo ket mabalinen a masulbar ti problema babaen iti panagtitinnulong.
Iinlungalong na kadagiti mannalon a dagitoy ti mangibaga no ania ti kasapulan da a tulong.
Immun-una iti daytoy, insingasing ti gobernador ti panagtaraken dagiti maseknan ti itik, native a baboy, free range chicken, pannakaipaay kadagitoy ti trabaho iti babaen ti cash for work ken dadduma pay.
Nagapela pay ti gobernador iti Provincial Engineering Office ken iti Department of Public Works and Highways a mangala da kadagiti kasapulan da a saan nga “skilled workers” kadagiti barbarangay a napakaroan iti kalamidad a mapaspasaran ti probinsya.
