LAOAG CITY – Napalaus ti yaman ken ragsak ni Gov. Imee Marcos iti agtultuloy a panangramrambak dagiti umili ti ili a Sarrat iti panagkasangay daydi Pres. Ferdinand Edralin Marcos.
Inbunannag ti gobernador iti panagbitla na kalpasan ti naisayangkat a “thanksgiving mass” iti nadakamat nga ili a bigbigbigen na ken ti sibubukel a pamilya da ti tinawen a pananglagip ken panangipaay da ti pammadayaw iti daydi Pres. Marcos nga ama na.
Imbatadna a nakaragragsak iti pannakidanggay na iti tunggal maysa iti pannakadanon ti maika-101 a kasangay daydi president Marco idi kalman.
Segun kenkuana, mangnamnama nga agtultuloy ti panangikarkarag daydi presidente Marcos iti ili a Sarrat a nakaiyanakanna nupay addan daytoy idiay paraiso.
Innayonn a a sigurado a nagtalinaed iti puso daydi presidente Marcos ti nadakamat nga ili.
Mainaig iti daytoy, impasingked na a ti ili a Sarrat ket adda ti espesyal a lugar iti puso na ken iti sibubukel a pamilya Marcos a kas iti sabali pay nga ili nga ibilbilang da a “hometown” ti pamilya da.
